Date: 18/July/2018

ដោយយោងទៅលើសេចក្តីប្រកាសពត៌មាន របស់ក្រសួងជំនាញ អំពីខេត្តមួយចំនួននឹងប្រឈមមុខនឹងខ្យល់ព្យុះ និងអាចបណ្តាលឲ្យមានភ្លៀងធ្លាក់ខ្លាំង លិចទឹក និងអាចបង្កជាទឹកជំនន់ភ្លាមៗ ។ នាយកដ្ឋានប្រយុទ្ធនឹងជំងឺឆ្លង សូមផ្ញើជូននូវសារអប់រំសំខាន់ៗ ក្នុងការបង្ការការឆ្លងជំងឺ និងគ្រោះថ្នាក់នានាជាយថាហេតុ។ សូមទស្សនានូវវីដេអូ និង​ សារអប់រំខ្លី ដែលភ្ជាប់មកជាមួយនេះ និងសូមអរគុណដល់ BEST TV ។ ពត៌មានបន្ថែម ឫរាយការជំងឺរាតត្បាត ឫកើតឡើងច្រើនខុសធម្មតា សូមទាក់ទងលេខ ទូរស័ព្ទទាន់ហេតុការដោយមិនគិតថ្លៃពីគ្រប់ប្រព័ន្ទលេខ 115 ។

Date: 15/July/2018

    សូមចុចអានសេចក្តីប្រកាសទាំងស្រុង ទីនេះ 

Date: 14/July/2018

សូមបងប្អូនប្រុងប្រយ័ត្នក្នុងការទិញស្រាសមកពិសារ ត្រូវទិញស្រាមានប្រភពច្បាស់លាស់ មានការត្រួតពិនិត្យត្រឹមត្រូវពីមន្រ្តីជំនាញ និងសូមមេត្តាពិសារក្នុងកំរិតទាបបំផុត។ យោងតាមទិន្នន័យការពុលស្រាកន្លងមក នៅតែជាបញ្ហាប៉ះពាល់សុខភាព និងអាយុជីវិត ។

Date: 06/July/2018

នាពេលថ្មីៗនេះ ប្រទេសជិតខាងយើង មានការប្រកាសពីការរីករាលដាល ជំងឺផ្តាសាយធំ H1N1 (ដែលកាលពីឆ្នាំ២០០៩ ហៅថាផ្តាសាយជ្រូក តែមេរោគផ្តាសាយនេះ បានបំលែងខ្លួនទៅជាផ្តាសាយធំ ធម្មតាកាលពីឆ្នាំ ២០១២ ម្លេះ) ដែលបណ្តាលឲ្យឈឺ និងស្លាប់ជាច្រើនករណី ។ ចំពោះប្រទេសយើងវិញ នាយកដ្ឋានប្រយុទ្ធនឹងជំងឺឆ្លង ក៏ទទួលបានរបាយការណ៏ ពីការកើនឡើងនៃជំងឺផ្តាសាយធំ ដែលក្នុងនោះក៏មានឃើញវិជ្ជមាន មេរោគផ្តាសាយ H1N1 ផងដែរ តាមរយៈប្រព័ន្ធតាមដាន ជំងឺផ្តាសាយ តែពុំទាន់រកឃើញ ករណីធ្ងន់ធ្ងរនៅឡើយទេ តែទោះជាយ៉ាងណា សូមបងប្អូនប្រុងប្រយ័ត្ន និងចូលរួមបង្ការ ការឆ្លងជំងឺផ្តាសាយធំនេះ។ តាមការសិក្សាស្រាវជ្រាវ របស់នាយកដ្ឋានប្រយុទ្ធនឹងជំងឺឆ្លង រកឃើញថា ក្នុងប្រទេសយើង នៅក្នុងរដូវភ្លៀងជារដូវដែលមាន ឆ្លងជំងឺផ្តាសាយធំច្រើន ដែលបង្ករឡើងដោយ មេរោគផ្តាសាយច្រើនប្រភេទ (Seasonal Influenza: H1N1, H3N2, H2N2, Influenza B & C) ដូច្នេះសូមបងប្អូនទាំងអស់ មានការប្រុងប្រយ័ត្នខ្ពស់ ដើម្បីកុំឲ្យចំលងជំងឺផ្តាសាយធំនេះ។ ក្រុមអ្នកជំងឺដែលមានជំងឺផ្តាយសាយធំ អាចវិវត្តន៏ទៅជំងឺធ្ងន់ធ្ងររួមមាន កុមារអាយុក្រោម៥ឆ្នាំ មនុស្សចាស់លើសពី៦៥ឆ្នាំ ស្រ្តីមានផ្ទៃពោះ និងអ្នកមានជំងឺរ៉ាំរ៉ៃ ។ ការបង្ការជំងឺផ្តាសាយធំ រួមមាន៖ ឧស្សាហ៏លាងដៃជាមួយសាប៊ូ និងទឹក លាងជាមួយអាល់កុល ឬថ្នាំហ្សែល នៅឆ្ងាយពីអ្នកជំងឺផ្តាសាយលើសពី១ម៉ែត្រ ឲ្យអ្នកជំងឺផ្តាសាយពាក់ម៉ាស់ និងលាងដៃនឹងសាប៊ូនិងទឹកដែរ ។ រោគសញ្ញាជំងឺផ្តាសាយធំរួមមាន: គ្រុនក្តៅលើសពី ៣៨.៥អង្សាសេ និងមានក្អក ឫឈឺក និងករណីខ្លះអាចវិវត្តន៏ទៅហត់ ។ ការព្យាបាលគឺ: ប្រើថ្នាំបញ្ចុះកំដៅ ផឹកទឹកឲ្យបានច្រើន គេងលក់ស្កប់ស្កល់ កាត់បន្ថយការហាត់ប្រាណ ហូបអាហារសំបូរជីវជាតិជាពិសេស វីតាមីនសេ។ ការប្រើថ្នាំផ្សះគ្មានប្រសិទ្ធិភាព សំលាប់មេរោគនេះទេ ថែមទាំងធ្វើអោយសុខភាពទ្រុឌទ្រោម និងមិនងាយជាពីជំងឺផ្តាសាយទៀតផង។ បើការព្យាបាល៣ថ្ងៃមិនធូរស្រាល ឫវិវត្តន៏ទៅជាហត់ខ្លាំង សូមអញ្ជើញទៅពិគ្រោះជំងឺជាមួយគ្រូពេទ្យ យើងមានឱសថ សំរាប់ព្យាបាលសំលាប់មេរោគផ្តាសាយធំ ។

បើបងប្អូនឃើញរោគសញ្ញាគ្រុនក្តៅច្រើន ឬផ្តាសាយច្រើន ក្នុងភូមិ ក្នុងសាលា ឬកន្លែងធ្វើការ សូមទាក់ទងលេខ 115 ដោយមិនគិតថ្លៃពីគ្រប់ប្រព័ន្ធ។
អ្នកនាំពាក្យក្រសួងសុខាភិបាល

Date: 23/June/2018

មន្ទីរសុខាភិបាលខេត្ត រាជធានី កំពុងបើកយុទ្ធនាការ ដាក់ថ្នាំអាបេត បាញ់ថ្នាំមូស ចុះអប់រំផ្ទាល់ដល់មូលដ្ឋាន ដោយសហការជាមួយ អាជ្ញាធរដែនដី វត្តអារាម ព្រះសង្ឃ សាលារៀន សិស្សានុសិស្ស ដើម្បីទប់ស្កាត់ ការរាតត្បាតនៃជំងឺគ្រុនឈាម ។​ ការមានភ្លៀងធ្លាក់ជាបន្តបន្ទាប់ អាចបណ្តាលឲ្យមានទឹកដក់ និងបងប្អូនខ្លះត្រងទឹកភ្លៀង ទុកសំរាប់ប្រើប្រាស់ ដូច្នេះជាឱកាសបណ្តាលឲ្យ មូសខ្លាពងដាក់ បង្កជាដង្កូវទឹក និងកើតជាមូសខ្លា ដែលជាភ្នាក់ងារចំលងជំងឺគ្រុនឈាម។ តាមរបាយការណ៌ពីមន្រ្តីជំនាញ រកឃើញថា មានការកើនឡើងជំងឺគ្រុនឈាម នៅខេត្តមួយចំនួន ដែលបណ្តាលឲ្យខេត្តទាំងនោះ បានចាត់វិធានបាញ់ថ្នាំសំលាប់មូសខ្លា និងបើកយុទ្ធនាការដាក់ថ្នាំអាបែតបន្ថែម។ ដូច្នេះដើម្បីបង្ការ កុំឲ្យផ្ទុះជំងឺគ្រុនឈាម ក្នុងតំបន់បងប្អូនរស់នៅ សូមបងប្អូនចូលរួមទាំងអស់គ្នា ក្នុងការបំបាត់ជំរកដង្កូវទឹក ក្នុងផ្ទះ ជុំវិញផ្ទះបងប្អូន ទីសាធារណៈនានា និងក្នុងវត្តអារាម ការពារកូនកុំឲ្យមូសខាំ ដោយពាក់ខោអាវគ្របជិតខ្លួនកូន គេងក្នុងមុងជានិច្ច ទាំងពេលថ្ងៃនិងពេលយប់ ។ សូមបងប្អូននាំកូនទៅពេទ្យជាបន្ទាន់ បើសង្ស័យថាមានជំងឺគ្រុនឈាម ។ រោគសញ្ញាជំងឺគ្រុនឈាមរួមមាន គ្រុនក្តៅ ឈឺក្បាល ឈឺក្រោយរង្វង់ភ្នែក ឈឺពោះ និងករណីខ្លះ មានកន្ទួលក្រហមលើស្បែក ឬសញ្ញាហូរឈាម ។ បើបងប្អូនឃើញជំងឺគ្រុនក្តៅច្រើន ខុសធម្មតាក្នុងភូមិ ក្នុងមូលដ្ឋានរស់នៅរបស់បងប្អូន សូមផ្តល់ពត៌មាន ទៅមន្រ្តីសុខាភិបាល ដែលនៅជិតបងប្អូនបំផុត ឫរាយការណ៏តាមលេខទូរស័ព្ទ 115 ដោយមិនគិតថ្លៃពីគ្រប់ប្រព័ន្ធ ដើម្បីឲ្យមន្ត្រីជំនាញចុះឆ្លើយតបជាបន្ទាន់ ៕